బంగ్లాదేశ్‌లో కీలక రాజకీయ పరిణామం చోటుచేసుకుంది. బంగ్లాదేశ్ నేషనలిస్ట్ పార్టీ (BNP) సీనియర్ నేత మీర్జా ఫక్రుల్ ఇస్లాం ఆలంఘీర్ దేశ నూతన అధ్యక్షుడిగా ఎన్నికయ్యారు. గురువారం జరిగిన అధ్యక్ష ఎన్నికల్లో ఆయన తన ప్రత్యర్థి, రిటైర్డ్ కల్నల్ ఓలీ అహ్మద్పై స్పష్టమైన ఆధిక్యంతో విజయం సాధించారు.
మొత్తం 343 మంది చట్టసభ సభ్యులు ఓటింగ్‌లో పాల్గొనగా.. మీర్జా ఫక్రుల్ ఆలంఘీర్‌కు 255 ఓట్లు లభించాయి. ఓలీ అహ్మద్‌కు 88 ఓట్లు మాత్రమే వచ్చాయి. దీంతో ఆలంఘీర్ బంగ్లాదేశ్ అధ్యక్ష పదవిని దక్కించుకున్నారు.
1991 తర్వాత తొలిసారి పోటీతో ఎన్నికలు
బంగ్లాదేశ్‌లో ఈ ఎన్నికలకు ప్రత్యేక ప్రాధాన్యత ఉంది. 1991 తర్వాత తొలిసారి అధ్యక్ష పదవికి పోటీతో ఎన్నికలు జరగడం ఇదే కావడం విశేషం. సాధారణంగా ఏకగ్రీవంగా జరిగే అధ్యక్ష ఎన్నికలు ఈసారి ఇద్దరు అభ్యర్థుల మధ్య ప్రత్యక్ష పోటీకి దారితీశాయి.
ప్రస్తుత అధ్యక్షుడు మహమ్మద్ షహాబుద్దీన్ ఆరోగ్య కారణాలతో రాజీనామా చేయడంతో ఈ ఎన్నికలు అనివార్యమయ్యాయి. ఆయన స్థానంలో ఇప్పుడు మీర్జా ఫక్రుల్ ఇస్లాం ఆలంఘీర్ బాధ్యతలు చేపట్టనున్నారు.
శుక్రవారం ప్రమాణ స్వీకారం
అధ్యక్షుడిగా ఎన్నికైన ఆలంఘీర్ శుక్రవారం ప్రమాణ స్వీకారం చేయనున్నారు. ఆయన బాధ్యతలు చేపట్టడంతో బంగ్లాదేశ్ రాజకీయాల్లో కొత్త అధ్యాయం ప్రారంభం కానుంది.
మీర్జా ఫక్రుల్ ఇస్లాం ఆలంఘీర్ ఎన్నికపై బంగ్లాదేశ్ రాజకీయ వర్గాల్లో ఆసక్తి నెలకొంది. రాబోయే రోజుల్లో ఆయన నాయకత్వం దేశ రాజకీయ పరిణామాలపై ఎలాంటి ప్రభావం చూపుతుందనేది ఆసక్తికరంగా మారింది.
