ఆమ్‌ ఆద్మీ పార్టీ (AAP) సీనియర్ నేత, ఢిల్లీ మాజీ మంత్రి సత్యేందర్ జైన్‌ను ఢిల్లీ అవినీతి నిరోధక శాఖ (ACB) మంగళవారం అరెస్ట్ చేసింది. ఢిల్లీ జల్‌ బోర్డు (DJB) ఆధ్వర్యంలోని మురుగునీటి శుద్ధి ప్లాంట్లకు సంబంధించిన టెండర్లలో అక్రమాలు, అవినీతి జరిగాయన్న ఆరోపణలపై నమోదైన కేసులో ఈ చర్య తీసుకున్నట్లు అధికారులు తెలిపారు.
ఈ కేసులో సత్యేందర్ జైన్‌తో పాటు మరో ఐదుగురిని కూడా ACB అదుపులోకి తీసుకున్నట్లు సమాచారం. టెండర్ల కేటాయింపు, పనుల నిర్వహణలో నిబంధనలకు విరుద్ధంగా వ్యవహరించారన్న ఆరోపణలపై దర్యాప్తు కొనసాగుతున్నట్లు తెలుస్తోంది.
ఇదిలా ఉండగా, ఈ వ్యవహారానికి సంబంధించి 2025లో ఎన్‌ఫోర్స్‌మెంట్ డైరెక్టరేట్ (ED) కూడా చర్యలు చేపట్టింది. మనీలాండరింగ్ నిరోధక చట్టం (PMLA) కింద సత్యేందర్ జైన్ సహా మొత్తం 14 మందిపై ఛార్జ్‌షీట్ దాఖలు చేసింది.
తాజా అరెస్ట్‌తో ఢిల్లీ రాజకీయాల్లో ఈ వ్యవహారం మరోసారి చర్చనీయాంశంగా మారింది. కేసులో ఆరోపణలు ఎదుర్కొంటున్న వ్యక్తులపై దర్యాప్తు ఏ దిశగా సాగుతుంది, తదుపరి ఎలాంటి చర్యలు ఉంటాయన్నది ఇప్పుడు ఆసక్తికరంగా మారింది.
